KERSBOODSKAP EN AFSLUITING

Die tyd het snel verbygehaas en ons kom aan die einde van 2021. Graag wil ek elke personeellid, leerder, ouer en beheerliggaamslid hartlik bedank vir 'n uitdagende, maar besige jaar wat ons beleef het.

Baie dankie vir al die mooi prestasies en vir elkeen wat op sy manier help uitbou aan Laerskool Vaalwater.

Ek wil vra dat ons almal hier by Laerskool Vaalwater met positiewe verwagtinge die volgende jaar sal inwag. Met die leiding van ons Hemelse Vader en die kennis en ervaring deur geslagte aan ons gegee, bestaan daar geen twyfel dat hierdie trotse skool nog vêr in die toekoms sal groei en kinders sal uitbou wat hulle plekke sal volstaan tot voordeel van ons land Suid-Afrika -

“Lank lewe Vaalwater!” Waar 'n welverdiende rustyd nou voorlê, wens ons u almal 'n aangename vakansie toe. Mag u krag en vreugde daaruit put en mag elkeen 'n ware Christus-fees beleef. Mag die vrede wat Jesus se geboorte op aarde gebring het, ook in hierdie tyd deur almal by Laerskool Vaalwater beleef word. Mag almal saam met hulle geliefdes 'n wonderlike Kersfeestyd beleef!

Luk. 2:14 “Eer aan God, Eer aan Hom wat in die hoogste hemel bly. Vrede vir almal hier op aarde- Vrede vir almal oor wie God nou feesvier.”

Geseënde Kersfees, en Voorspoedige nuwe jaar!

Valiegroete

LH Vorster

(Hoof)